Greva e punëtorëve të ndërmarrjes “Pastrimi” po vazhdon edhe këtë ditë vikendi para objektit të Komunës së Prishtinës.

Ardian Krasniqi, kryetar i Sindikatës së punëtorëve ka bërë të ditur se greva do të vazhdoj deri në përmbushjen e plotë të kërkesave të tyre, përcjell Arbresh.info.

“Sot, me datë 25 maj 2025, ditë e diel dhe ditë vikendi, ne vazhdojmë të qëndrojmë në grevë. Greva do të vazhdojë deri në përmbushjen e plotë të kërkesave tona nga ana e Komunës së Prishtinës. Falënderojmë qytetarët për mirëkuptimin dhe mbështetjen që na kanë ofruar gjatë kësaj periudhe”, ka shkruar Krasniqi.

“Po ashtu, shprehim mirënjohjen tonë për gazetarët, për përkushtimin dhe punën e tyre të palodhshme në raportimet e sakta dhe të paanshme mbi kauzën tonë. Ne mbetemi të vendosur dhe stoikë në kërkesat tona – Greva vazhdon”, tha Krasniqi.

Ndryshe, punëtorët e kompanisë rajonale “Pastrimi” kanë nisur grevën e tyre në oborrin e Komunës së Prishtinës që nga data 22 maj 2025./Arbresh.info